వచ్చాయి ఋతుపవనాలు....
తెచ్చాయి ప్రకృతికి అందాలు......
బురదలో అడుగులు
బూడిదలో నీటి చుక్కలు
ఆకాశంలో మెరుపులు
నేలపై నీటి గుంటలు
కొండ చరియల్లో నీటి ఊటలు
కోనల్లో ఉభయచరాల శబ్దాలు
సంధ్యాకాలంలో కోయిల గేయాలు
సాయంకాలంలో తూనీగల రాగాలు
వర్ణించలేని ప్రకృతి అందాలు
ఊహించని విద్యుత్ ప్రమాదాలు
చకోర పక్షి ఎదురు చూపులు
మేఘాల మధ్య చంద్రుని కొంటె చూపులు
ఢమ.. ఢమా అని ఉరుములు మెరుపులు
క్యార్.. క్యార్ అని పిల్లల ఏడుపులు
జంతువులు చెట్ల కింద ఒరెగినె
వడగండ్లు కాలకింద కరిగినె
గొడుగు పువ్వై విచ్చుకొనె
ముసలి వాళ్ళు ఇంట్లో మొగ్గై ముడుచుకొనె
చుక్కలు శూన్యమాయే
సూర్యుడు శాపమాయే
పేపర్లు పడవలై ప్రవహించే
కొబ్బరి ఆకులు రాకెట్లై ప్రయాణించే
వాలిన చెట్లు
రాలిన కాయలు
కూలిన ఇళ్లు
మునిగిన పడవలు
ఇలా ఎన్నో ఆశ్చర్యాలు ఇంకెన్నో అద్భుతాలు
ఊహించని పరిణామాలు, ఊహించే పరిణయాలు
గుర్తొచ్చే సందర్భాలు గుర్తుండి పోయే సంఘటనలు.....
వచ్చాయి ఋతుపవనాలు....
తెచ్చాయి ప్రకృతికి అందాలు......
రాలాయి తొలకరి చినుకులు
గుర్తొచ్చాయి చిలిపి పనులు.
ప్రయాణించే నీటి ప్రవాహాలు
పులకరించే నాలోని చిన్ననాటి జ్ఞాపకాలు
ఇలా వాన పోయే వంకకు
నా కవిత్వం పోయే కంచెకు
